Mi Vangtah Hi Na Lawmlawm Ing E!

Kum 1979 October 18 Ningatni in Military Hospital, 101 Shillong, Meghalaya ah ka pa sepaih panglai in hiai khovel mihing khat hisam ding in ka nu sung apan kong piangkhia hi. Ka piangkhia in ka nu leh pa kinepna leh a kipahna mahmah uh ka hi hi. Kum te hong liam zel in Shillong apan Leisang khua Lamka leh Imphal kikal ah ka pi leh pu te toh khosa khawm ding ka nu toh kei naungek kum khat le pha nailou ka pu in hongpi hi. Ka ngaihtuah kik chiang in mite'n leitung khosakna ding a ngaihtuah na ziak un Lamka khopi a zilna sa'ng a sangzaw chi in khopi thupi leh changkang taktak haksa sa pipi a a delhlai un kei Lamka lam ah ka pa'n hon koih maimah hi. Ka pa a na pildeuh hileh ka nu toh Shillong khong ah hon khosak pih dia hileh a tate'n le pilna leh siamna leitung vai ah leng sangtak ngahpha ban ding chu hi ung ua, himahleh Leisang apan Mission Veng, Lamka ah hon peem touh pih ua tua mun ah hon khosakpih a mi bang a khosak nuam sa a lah ki omlou, genthei tak leh midangte eng vungvung a ki khosa, thil ka hihkhelh chiang a lah ka nu hi in ka pa hileh hondom lou uh. Tua ziak mah ahi ding a kingaihsiatna ka lungsim guktak a ka nei a mipha zoulou kisakna leh sih khong ut ngoihngoih hun ka nei tam mahmah hi. Ka neulai hun apan in mahni a kithah khong ka na tum gu gige hi. School khong ki kai lehle lawmte banga van hoih lah kineilou. Unau 4 bang kong phak chiang un ei a upa zaw bang nu leh pa'n hon ngaihtuah khollou uhi. Banghiam van deih deuh nei lele hon leisak lou uh ka naute a ding ahihleh lah a duh a deih uh leisak zel uh. Innkuan sung apan himhim in gentheihna ka na thuak pah a tua pen ka kalbi(a hoihlam a ka pansan) dia ka na zat sang in a hoihlou lam apai in khovel a ka na lauh gige damdawi kikap chihkhong tu in ka maingal pen hongsuak maimah hi. 

Behlap zel ding..... A thu kal laklak ah leng behlap lai ding thu tampi mahmah omlai hi.