THUHILHNA KA ZAKTE A NA ZUI KHA LEN'G ZAW MAW?

THUHILHNA HOIH KAZAKTE NA ZUIKHA LE'NG ZAW

Ka neulai in mi damtheilou takmai ka na hi hi, ka pa sepaih panglai a Military Hospital, Shillong ah na piang ka hi a kho hun nuamtak kholum hun beikuan leh phalbi kipat hun phavang lai ahi hi. Homahleh ka piangkhiak zohnung sawtlou in ka pa'n ka pu Leisang, Lamka ah om a samtou a ka nu toh kei hong pii khe sak hi. Leisang kong tung chiang un Shillong gam leh kho om dan toh nakpitak in kikhia a huai ziak mah a damtheilou hiding ka hi. Ka nu hi mi thanuam taima tak ahi a lou khong bawl in zingsang baihtak tak in hon lou honkuan san in kei leh ka pi leh ka pu inn ah ana ki don ding in hon naw se zel hi. Ka genhak chiangin ka pi in ka duhduh ding chi in kawltutuikang khong in hon khem zel hi. Kum 3 nung in ka sang ding numei khat nau ka nu a hon neikhe nawn hi. Huchi in sawtlou kum 5 khong Leisang khua ah ka omnung un Lamka Mualpi tua Mission Veng kichihna mun ah ka pute gam ah gamveng ding kawm in ka pemlut uhi. Huai hunlai kum 1983 khong in gamlak singkung tamtak in hon um kimvel in kiteng a Leisang khua a lamlian kiangah ka tenna mun uh toh kikhe mahmah in dainawl in dai mahmah a kholai bazar lam hoh ding chiangin Lamka Hanmual leh HillTown hanmual te tot ngaisek hi. Hiai hunlai in mihing kilau lou a gamsa leh dawi leh sikha khong peuh kilau mahmah hi. Kumte hong kivei zel in mi hong pungtou zel a innveng ding khong bang hong teng in hong gamlum tuam mahmah hi. School sunchiang a kai in nitak chiang in ka nu'n lai honhilh zel hi. Ka nu ahihleh sunchiah loukuan sek a a khenchiang in hotel bawl in om zel hi. Ka veng uah mi hongteng lut tam panpan in kum 1988 chiang bang in hunkhop kipha thei ta hi. Ka inn uah ka nu naute ka pute leh ka nuneute hong ban om uhi. Hong panpih kawm ding leh amau manan ding ngaihtuahna kawm in. Ka pute(ka nu naupa) khong toh school ka kai khawm uhi. Ka nuneute ahih uhleh a tangpi in nnasem ding leh kilohtawm ding kia a hong om a hi zaw uhi. Ka pute hong om masapen in lohchinna ngahlou in a kholam uh kik hi a ziaktuh Lamka ah khamtheih hong kithang tunglai ahihman in a na kibualkha zek hi. Himahleh 1995/96 lai a hong om ka puneu pen ahihleh laisiam lua hikei mahleh a kuhkal banah a mihoih ziak in lohchinna leng sangtak hon ngah hi. Kei ka hih leh ka hinkhua ah kingaihsiatna leh poisakna bei a lungtang nei a hinkho zatna in hon nawk tou den hi.