HIV Natna Vei Ka Himaimah

Pasal mi chitak leh ginom khat ka hi a, ka hihna lam phot chitak tak a hih ka hi. Himahleh ka ngaihzawng nu toh hun nuam zang a ka omlai un ka kigai kha ua huchiin 2000 kum in ka kigu uhi, a nu leh pa te'n hon deihlouh ziak un ka kikhen kik pah maimah uhi. Ka khen nung un ken ka maban ding khualna in laizil sunzawm ding in Shillong lam ah ka zin suk hi. Kha 3 khong ka om in Post Office tungtawn a laithon kikhak in ka kithuzak zel uhi, huai kha 3 zoh in Puja suty in innlam kong pai zual hi ka ngaihzawng nu mel mah mu nuam in leh a naupai bang a chi a chih thu thei ut in. Lamka kong tung a a zing in sun in ka ngaihnou te inn ah va hoh in ka kimu uhi. Himahleh ka damsung ka hinkhua suse zou ding in thu hoihlou ka hon za ta mai hi. A naupai a sukiak ua huchiin ka lungtang hon sukha mahmah in ka kingaihsiat loh a ka maban ah lam et dang bangmah ka nei non kei hi. Lawmte toh kimu in amau khamtheih damdawi hih in a na kikap ua keile kikap(injection) kichi himhim lau himahleng ka lungtang naa ka puakgik te mangngilh na ding chi in ka hong kikap ta mai hi. Huai ni apan damdawi addict ka hong himai ta hi. Ka piangtung apan Jesu Khrist leh ka nu leh pa leh ka sanggamte chihlouh hiai leitung a ka itpen ka ngaihnou ka hon mangngilh ta a ka hinkhua ah khamtheih toh buai tou in ka hinkhua ka hon zang a ka laizilna le Shillong ah Class XII zou lou a tawpsan in Lamka ah ka sunzom a BA(Pol. Sc) Hons. First Year zil zoulou in ka laizilna lam ka tawpsan ta hi. Huchia kum 10 val bang ka hinkhua a khamtheih leh rehab centre toh ki thuah tou nengnung in ka buai a hiai hunsung in ka lawmte tamtak inle hon sihsan a a tawp a kining gawp in ka khamtheih hih ka kholsan a himahleh zu nitaklam in ka dawn zel hi. NGO khat ah sem in nitaklam office kaitawp chiang in zu ka dawn zel hi. Nitaklam Saturday ni in office kaitawp baih in zudawn na mun ah ka zuan pah hi. Ka zudawn na sekte a na pawt ua keile a innkiang uah khamtheih zuak ka melthei nuthoi khat om ama inn ah khol in ka phone ka khoih a laa ngai in ka zudawn na sekte hong paikik ding ngak in ka om hi. Ka kholna nu leh a lawmnu a kick fuh sim tuak ahiding ua sam khong dressing bawl in buai in buai uhi. Kenle chimthoina in a lem uh khong kana la hi, ka zudawn na dingte pawt hong tung ua keile amau in ah zudawn ding in kapaisuk ngal hi. Zudawn in lawmte khong toh houlim in ka tu nilouh a khua hong mial man in ka pai a chileh zudawn dia ka kuan a kholna mun a nungak/nuthoi om nu lampi ah na om in ka phone mi ka call ding om chi in hon ngen a kenle ka zangsak hi. Chileh a guk a ka number a na la ahi a huai banah hon na meltheih gu sim khat a na hi hi. Amah ahihleh numei pasal neih a vangsia a pasal a kimawl a kizuak(call-girl) a na hidan ahi. Ka kizui tou zek ua chileh Tedim Road ah ka suahkhiak touh un a ngaihzawngpa chihdan deuh hongpai a hong heh mawk a keile pautam lou in ka pai a inn ka tung a bangpi inle ka ngai kei hi. Ann ne zou TV en in dak 10 lak a lum dia ka kisak leh ka phone ah SMS honglut in, "Lumta moh?" hon chi hi. Kenle dawngkik in, "Hi lumta" ka lel hi. A zing Sunday zingkal ahi a sun office kailou ding ka hihman in dak 7 lak in ka potkhia a zing zu dawn ding in ka kuan hi. Huchia ka lampi ah ka pailai in Bus Parking, New Bazar ka tung in ka phone number theihlouh chile zan nitak a ka ngaih thupi hetlouh number hong ki SMS na in hong ki call a kenle kua a mahmah de aw chi in ka pick up hi. "Hello, bang a, kua e nang?" ka chihleh "Hon theilou moh? Zan nitak a hon message pen ka hi"  hon chi a kenle theilou ka hihdan ka gen leh hon na ngak ou kongpai hon chi a kenle "Aw Bus Parking ah kon na ngak di" chi in ka phone koih in kua a mahmah de aw, zan nitak a nu ahihleh New Lamka lam apan hongpai ding hi inteh chi in Tedim Road, Thangzam Road bul apan khong in na gal et in ka na ngak mawk hi. Chileh kei paina lampi lam apan ka nung a hongpai in hong nui vevu in "Kei ka hi" honchi hi. Huchi in ka kitawnsuk ua ken bel amah ka thei ngeikei a bangchi bang mihing a chihle ka theikha ngeikei himahleh kizuak khat hiam hiding in ka muangmoh lel hi. Ka zudawn na mun ah kei ka hoh a amah ahihleh zan a a omna a lawmnu khamtheih damdawi tang zuaknu kiangah lut hi. Kenle zudawn in ka om a aman hong vil vil a chihleh ka zudawn pih lawmte khenkhat in amah bang chi bang mihing a chih a na thei mahmah ua kipolhpih/kizuihpih hetlou ding in hon gen in hon thuhilh pah uhi. Himahleh ka zudawn ka kham man in leh sum ka neih khollouh man in ka kizuihpih hi. Hon treat zoh ziak lel in. Huchiin sunkhua in ka kizui ua hon treat den a nitak dak 8 vel a innlam ka pai dek in ka hong kha di numei hichi khong a kholai a pot a ut leh dah a om hoih lou ahi chi in New Lamka lam ah ka khak sawm leh aman ka veng lamte uh ahihdan hon gen in huchi in kiton in kapai uhi. Amah bel sun hun leh innlam ka pai matan khong unle a kallak in a gam a zuak cheuh zel a na hidan ahi. Innlam ka pai un gamlak ka veng paam lam uh hon totpih in huchi in gamlak ah ka kisial puk ekh ta mai uhi. A zing non Monday dak 9:30 a office ka kuan ding inle hon message a honna ngak in keile office kai dek ka hi SHALOM ah a chi hi. Mak ka sa sim mahmah hi. Himahleh ngaklou in ka kuan san vengveng hi chihleh lampi ah hon delhpha in ka ton ua a office uah kha in keile ka kuan suak hi. Himahleh ka office khong uah a kallak in hongpha a hong hoh zauhzauh a kei hong kan hi. Ka staff ka seppih te a tam zaw in amah a na theih mahmah ua kizuipih leh kipolhpih lou ding leh pilvang a kingaihpih hetlou ding in hon thuhilh uhi. Himahleh kei bumhai a om khin ka hidiam ah ka kizuihpih a ka lungtang in ka hehpih mahmah mawk hi. Huchia kong kipolh ua kong kizuih toutouh uhleh a tawp in innlam le pailou in a lawmnu khamtheih zuaknu kiangah giak in ann khong ne in ka om ua kou leh kou kibuaipih in thildang awlmoh lou in hun ka zang ua ni 10 val bang huchia kong om uhleh a upa Khup kichi khat in hong houpih in hong vau bawl mawk a ken a sanggamnu kizuak dan a bawl a ut leh dah a ka ompih sa in kitengpih vanglak ding in hong vau hi. Haksa kasa sim hi koppih zi ding hial a neih taktak ding in. Aziak tuh kei bang a zudawn thei damdawi khamtheih tang ne a a chang kikap thei khat a chang chiang a va kizuak zetzet thei nuthoi khat zi dia ka neih ding. Himahleh a tung ah ka ut dandan ka om khum sa hiven hiven bangteng hileh chi in ka kigukpih mai ta hi. A thulimlou tuak tuak tuh ka kiteng sawt hetkei uh, ama business khah nuam lua ahiding a. Nau a pai chiang inle a phatuam kei. Kha 3 ka kiteng sung un 2 vei ka khen man uhi, huai zoh atawp in ka kikhen ua keile rehab centre ah ka om hi. Kha 3 ka om zoh in ka pot a ka kimu tuah kha non ua ka kizui non uhi. Sun leh zan a kizui in ut leh dah in ka om uhi. Kenle ka nu leh pa te kiangah pii kik ding in ka gen hi, himahleh a deih non teuhkei uhi. Kenle nikhat fuhsim in nitaklam ka nu te ann nek lai in non pii sak keiding uhleh ka khailum di peuh chi in ka kham man in ka kikhai a ka sikhial hi. 

Huchia hunte zangtou in amah toh kizui zel in ka om uhi. A tawp in ka pa kiangah honpi kik sak in ka chihleh piikik nonlou ding honchi a kenle ka zukham man in ka pa mai ka boxing kha laizang hi. Chihleh ka pa le hehlua in rehab centre sam in hon matsak a sawm uhi. Himahleh kei inn ah omlou in ka innsak uh gamlak ah ka lum hi. Dak 11 vel a ka pai in inn ah ka naupa a na om a bang dia i pa na khoih eh hon chi a ka dawngkei hi. Ka lum a ka hoih ihmut mahmah a zingkal in ka lupna tung apan hong kizawngkhia in rehab centre ka tung hi. Hiai rehab ah kha 6 om in ka pot a chih leh ka rehab om sung in ka lawmnu ut leh dah a na om in HIV a na positive hi. Rehab apan ka potkhiak in ka kimu non pah ua ka kizui non pah uhi. Huchi in aman a HIV+ hik nou hon hawm a keile ka vei loh ta hi. 

Hinkhua ichih i damsung a ut leh dah a zat ding na hi hetlou ahihdan ka phawk khia hi. Himahleh a kikhel ta ka damsung tuh HIV+ a damdawi nektouh detding ahi maita hi.