A HOIH DING THEIVEK; SEP SAWMLOU

Midang-Namdang te gam khang tou hiaihiai in nuamtak in a gam uah khosa hiauhiau uhi. A gamsung uh amau aa dan in koih chiat ua kem siangthou in hoihtak in zun ua - lamlian te hoihtak in a mohpawtu department in kem in a siatna omte bawlhoih pahpah uhi. Mipi tuinek ding saitu leh mohpawtu te'n leng huchi bang mah in tui kiningching a kaikhawm in a hun hun in mipite kiangah pekhe zel uhi. Huchi bangmah in department tuamtuam in amau mohpuakna chiat hoihtak in sem ua huaiziaktak in a gam uh nuam in khangtou mahmah hi. A kallak ah bel banghiam vangsiatna ziakin khovel apan piangkhia tuahsiatna te tuh a hong om ding mah ahi. Himahleh, tuabangte khong hong om guih lehleng maituah thei ding a kimansa a omdiam khin uh ahi. 

Ei lak ah ennon lehang, tuabang a khovel a piangkhia tuahsiatna khong hongtung lehleng maituah a doudal a kiveng thei ding a kisinsak a mansa a om kuamah ki omlou ding hi huai banah philanthropic organization te leh Village Authority te bang leng tuahsiatna tuamtuam akiveng dingdan leh first-aid treatment leh maituah dingdan sinsak poimoh uhi. Hiai government agencies leh students volunteer tuamtuam te training bang a (NCC/NSS/VDF/Police/NDRF/etc) train sak ding poimoh ahi uh. 

I theihchiat sa uh himahleh genzelni, I khua leh vengsung mahmah uhleng siangthoutak a tuni tan koihthei mahmah lou, hawkguam te lah niin i deihlouh teng uh paihkhawmna mun ding khong a zang mawk in vuah hong zuk zek chiang a tua i niin paihte'n hawk guam hu bing in huai chiang in hawktui honglet a lampi ah hong luang zuazua zel hi. Hiai i niin deihlouhte a kangtum a mel a haltum theih ding teng i haltum ua a kang theilou teng lei munkhat i tawhkuak a tua mun a i paihkhom a i phum mang ding uh ahi. Huai banah tui nek ding PHED te water supply lasawn peuhmah inleng a tui zawlna uh tuilawng hoihtak a a etkai ua a hawkguam peuh ah a zaan louh ding ua a thuk deuh lei lampi nawl tou a a phum ding uh ahi. A tui zawlna uh tuilawng apan tui hong pot a lampi teng hon suk kot chiang un lampi kisesak in nuam lou hi. A hoih ding leh hoihlou ding i theih chiat uh ahi kuapeuh in a hoih ding bang in nna sem leng i gamsung, khosung, vengsung khangtou ding a nuam ding hi. Lampi bangleng i innkiang chiat ah a siatna a kuakna omte vuk in na bawlhoih chiat leng i lampi te uh hoih mai ding hi. Midangte hiam ahihkeileh Job Card a bawl ding dan kia a i koih sung uh I gamsung/khosung/vengsung uh khangtou ngeilou ding a lampite hoih ngeilou dia hawkguam te siangthou in hawktui hoihtak in luang ngeilou ding hi. Kuapeuh in eimah mohpuak bang in koih chiatni. Village Authority te hiam phatuamngai pawlpite ading leh sep ding kia a i koih khak nak sek pen uh ahi a hoihlou, i gam a khangtouh theihlouhna. Amau le semman hile uh sep ut law ding uh ahi himahleh sem manlou a a buaina ding khop uh thildang buaipih ding tamtak nei sam ding uh ahi.