Sikhate'n A Kumpinu Ding Ua Pi Sawm

2014 leh 2015 kikal lak in Singngat khua phakma unau Thadoute khua Haijang kikal ah khua om a, huai khua ah nungaknou khat om hi. Hiai nu Singngat khua ah school kai in niteng in kileh in kuan a bangmah gimna inle ngailou hi. Amau innkuan mi 6 a nu leh pa leh a sanggamte mi 4 khosa khawm ahi uhi. A nu leh pa bel lou nnasem ahi ua, a taimak ziak un nek lam ah kuamah englou in om uhi. A khokiang ua Haijang khua ah dawisiam khat om in hiai mipa'n dawi zang in nnasem zel hi. Mi khong in kithoihsak ding khong in va naih sek uhi. 

Den a i nungaknou gen Singngat ah school a naute toh kai a niteng a kuan a kileh gige pen nikhat damlou in lu nasa in khophawklou in hong om a, a ni zing in a nu leh pate'n le kintak in Lamka Damdawi Inn ah etsak ding in honpuak ua, Damdawi Inn hongtung un OPD ticket khong la pah in doctor ki-ensak pah uhi. Doctor kiangah a omdan khong gen ua himahleh doctor in huchia a natna ding dan mulou in damdawi tamlou toh test tuamtuam nei ding in paisak hi. A nitaklam in test ding tuamtuam te test in a zing in va la ua doctor kiangah valak uhi. A test tuamtuam te doctor in hon etchiang in natna bangmah mulou in, "kon damdawi piakte na nek zohchiang un hon ki ensak thak non un" chi in paisak hi. Amau le pai in sunnung bus in a kholam uah paisuak uhi. Huchia a khua uh a tungkik ua inn a hong om chiang un damlou gim in hong kipan zel a doctor damdawi piak a nat thuak nopna khong kipia ua himahleh bangmah phatuamlou hi. Niteng in huchi in buai ua kalkhat a ching in doctor kiang ah ki ensak ding in Lamka lam ah hong zinsuk non uhi. Lamka hongtung chiang un bangmah chilou in natna ding himhim omlou in chi dam mel mahmah zel hi. A khua ua a natna in a phak chiang in mi sisa daang kiakkuak bang in om a himahleh Lamka hongtung chiang in huchilou in dam mel mahmah hi. Doctor kiangah thil omdan gen in ki ensak ua doctor inle a loh ngaihna theilou in damdawi tamlou gelhsak non in paisak hi. Ama a bang in a kholam uh a tung chiang un a nat kipan zel a a tawp in mun dangdang a etsak ding in hong ki pawkik non pah ua, doctor dang dang a etsak nung unle a natna ding dan mulou uhi. A tawp in Meitei dawisiam maiba te ki ensak ua, a ki etsakna na pa un hichi in na gen hi, "mi kuate hiam in a hon enlah ua ahi" chi lel a bangbang hiam hihsak in paikik non ua a kholam uh a tung un maiba pa thupiak bang in a innkim uah ak sisan taaksak uhi. Huchia ahih uhleh a zan in hong buai a a innkiim uah mi tampi pau hileh kilawm leh thawm nei hong om in a zoh a innsung uah hong lut bang in om a, a lupna khong toh tua minu kidawm in zawnkhiak sawm hile uh kilawm in kongkhak lam manoh in ki zawngphei hi. Huchia hong omtak in a khozang ua kidelh huan in tangvalte'n a lupna len in boh khum ua huchia kituh a sawtsim a buai zoh un hong dai hi. Huai nitak apan sikhate'n pimang sawm ahihdan hon thei ua ama a a damlouh te le sikhate sukbuai hiding in koihpah uhi. A khosung ua tangval phatuamngai bangzah hiam in singtang thau khong toh giah pih in sun leh zan in veng den uhi. Ni thum zoh in tua sikhate hongkuan non ua a inn kiang ua kawlsing kung khong ah tuang in kisawi ua a khang a a ekbuk tung khong uah tu in lum vengvung in tua minu a damlou a pimang dek pen un muthei in midangte in muthei lou uhi. Huchia hiai minu kituh a a buailai un a numei nu pa'n sikhate kiangah hichi'n gen hi, "ka tanu nou bang ding na chih uh a? Bang ding a nong sukbuai det uhiam?" a chihleh a sikhate'n hichi'n dawng uhi, "Ka Kumpinu ding ua ka deih ziak ua a pii ding a hong kuan ka hi uh" chi uhi. Huaitak in a pa'n "nou sikha leh kou mihingte kizawm theilou ding" chi in a tanu hong pii dek sikhate toh a tanu kituh in kikang tuah nilouh ua a tawp in sikhate'n "hong kuan thak ding ka hi uh" chi in paisan uhi. Sikhate painung in a tanu nu khut khong khutchin a kiphuai keh bang in keh zengzung a a gim bang namsia in misi uih gim lamlam nam in a khenchiang in sisan thang gim khong nam huauhuau hi. 

A tawp in chih ngaihna theilou in Lamka lam ah hongzin ua New Lamka Vengnuam South ah mi thumdam thei numei khat om chih hon za ua, va naih pah uhi. Thumdam thei nu kiang a tun un midang le kithumsak ding hunkhop na om ua ngak zek in amau hun a tung in thil omdan thumdam nu kiangah gen uhi. Huchi'n thumdam thei nu'n le ahihding uh tuamtuam gen in leh maiba dawisiam a naih khak uh khong Pathian kiangah ngaihdam ngen ding in sawl a, a zoh kalkhat zoh a va kithumsak ding in thupia in paisak hi. Huchia pai in a kholam uah kik ua himahleh a ma a dan in damlou gim a omlou inleh sikhate hongkuan zel mahle uh innsung va lutlou a om in paisan zel uhi. Kalkhat zoh in va kithumsak non ua huaitak in a thumsak nu'n a siansuah zoh in khakhat zoh a a inn kong/kiang uah vualzohna sing kros phuh ding thupia hi. Khakhat zoh a thumdam theinu va zin in a inn uh va siansuah sak in a zoh sing kros va phuh sak hi. Huai nung bangmah chi nonlou in dam vengveng a tu in pasal nei in om in chidamtak in khosa hi. 

Sikhate'n le a khenchiang a mihingte hon enlah sek uh ahihdan theihtheih in om hi. Himahleh thumtu te tungtawn in Pathian in damna hon pe zel a Toupa min i phat ahi. 

Huai ziak a damlou hiam buaina tuamtuam hiam i neihchiang in thumdam thei te naih pahpah hoih ding hi. Thumdam thei chi a sum demand bawlte bel gingtak huailou zel uhi.