Sikha in ka khetul hon suihsak in hon taw pek

Kum 2009, July kha Pathianni khat in Songtal khokhung ah Zogam Tangvalte Temtatna-Mun apan in zingkal ann nekzoh dak 8:30 pel in Mualnuam khua ah van poimoh tuamtuam leh message pe ding in ka vahoh hi. Kei vuak ka hi a lampi ah thawmhau huaisim a bang a himahleh sun khovak lai a pai tuh pasal khat a kihihna ah lauh ding ka theikei hi. Mualnuam khua dak 10:30 lak in ka tung a dawr ah van poimoh tuamtuam leh heutute hon thukhah te lakhom in huchi in ka nuneute in khong va ban phak in ka va tawldam a ka message puak set-operator kiangah pia in huchi in nidang a Mualnuam khua ka zinchiang a ka lawm hoih mahmah Kai@Kamsuanmung om na zongkhia in a card kimawlna uah a kiangah ka va hoh hi. Nitaklam in kizuisuk in ka Puthang te inn ah lut in tuisik-ahang a a bawl dawn in huchi in ni hong tum dek petmah in ka pai hi. Mialnuam khua ka kheng in Kachin tangval te ka nung a hongpai in hon makhelh ua ka delh bawl leh le kapha zou kei hi. Ka khamsim ziak ahi dia ka lam pai a kin thei mawngmawng kei a Songtal leh Mualnuam ki gamgitna mun lui ka tung in khuamial simta hi. Huchi in ka paizel a short-cut lam ka zot touh in khuamial khe ta hi. Huchia ka pailai in sikha lang na a chih gige na mun uh ka tung petmah hi. Ka khetul hong ki sui sui a ka heh khong a, "nang bang kisa eh hon chou moh?" ka chih leh ka taw hon kipek a lamkhang ah bii lakah hong kisawnkhia a gawbul in hon nang a huai ah khol in ka thou non a ka delh tou a, "na jang hia, nang bang kisa eh hon chou moh?" chi in ka temta tawi in vai in ka vai ekh ekh a khua mial lua ahihman in ka lighter a light ka det dekleh hong vak theilou in hong om mawk hi. Huai tak in ka sai kuang sawm leh lah kuang theilou in om mawk a mailam nawt in ka pai theih dandan in ka pai a a tawp in hon subuai pen lampi awn in, "na pai masa in" ka chih leh hong dai in keile hoihtak a paithei in Songtal te khomual lui mun ka tung hi. Huai mun ah khawl zek tangmai khong ne in a zoh ka paitou non a chih leh mailam suan in ka pai thei hetkei a lampi ah hong ki nungkaih kaih mai hi. Mak kasa a a tawp in ka bok vak tou a a tawp tawp in ka paithei khong khong hi. Bangtan hiam ka pai nung in camp lui lutna mun ka tung a lamlian lam tot sang in camp lui lam kitawn leh kitung baih zaw inteh ka chi a ka tawn ta hi chih leh bangtan hiam ka pai nung in barrack lui omna munkhat ah mikhat tu ka mu ta hi. Kenle lawmte kei hong dawn dek sa in ka sap leh hon dawng kei a huaitak in Kachin Mualnuam khua apan ka pai a hon makhelh te hiding in ka koih thak a ka paisan hi. Chihleh a saklam ah na tu zel a mak kasa ta hi. Ka muh masak pen ka nung et leh lah om nonlou bangchi dan a bangchik kal a hia ah hong tu tou man ahi de aw ka chi a ka lau gu sim ta hi. A tawptawp in ka va naih phei a ka vahoupih a hon na dawng tuankei hi. Huaitak in khatvei ka houpih thak a, "hiai mun ah bang hih lah? Duty moh?" ka chihleh a aw pi a pi in hon dawng a, "nang hon ngak" hon chi mai tuh ka lau petmah a kin a kin un ka taitou vengveng a camp lui mun ka kheng in ka khawl a ka etsuk leh keilam manoh in hong lengtou a ka omna mun hon phakma lam 3 khong ding a gamla ah khol hi. Huai apat in hon en kelkul a kenle dipkua a lau a ling kawm a en a ka omlai in, lawmte torchlight salh kawm a kei hong dawn dia hong paite'n honlap in huchi in hong mang hiau a. Ka lawmte'n, "bangchi eh na gim tuak ngei Mualnuam khua apan tai a hongtai thoh moh na kho-ul khong in hon buak nasa tel a ahihkeileh lauh nei moh lauh neih na bang ve", hon chi ua ka dawng thei pah kei hi. Huchi in awl in hon paitouh pih ua camp dak 8 lak in ka tung tou uhi. Kenle ka van puak te hon thukhak te kiangah ban piak in a zoh ann  le ne lou in ka lum suak ngal a chihleh a zankhang apan khosik a damlou in gim a gim in ka ompan ngal a ka gim lah chu uih in thang gim nam in misi uih gim lamlam khong ka nam huauhuau hi. Khakhat zoh in ka damtak tak thei tuankei a Lamka lam ah ka paisuk hi. Huchia Lamka ka tungma tan uh vuah in lam tawn tung in hon zuk khum a a kallak in hong theu mahleh sawtlou hi. Lam tawntung khong in a khenchiang in bus tung ah tuang kahihna ah lamsak khong ah honna sam om bang in ka za mawkmawk a a khenchiang inlah gamlak kom apan khong in mel lamdang taktak pu in honna en kelkul khong ka mu vuatvuat hi. Lamka ka hong tung ua bangmah gimna leh damlouhna le ka nei nonkei mawk hi. Hiai thu kuamah kiangah leng ka genkei a thu phuah tawm leng ahikei a taktak a ka thil tuah te lakah khat ahi.