Itna Ziak Lel In

I lenna vangkhua Lamka ah mi tampi te amau buai chiat a kibuai in om ua, huchi kawmkal ah nungak leh tangval a kingaite bang leng kuamah englou in itna simthu sutkhom in sihna loungal in a khen nonlou ding bang in hanlung chiam uhi. Huchi bang kalah Steve kichi om a kum 2000 a a ngaihzawng a it mahmah toh a kikhen nung uh kingaisia a hinkhua zang in zu leh sa khamtheih khong hih in om a bangmah lam et dang nei nonlou in a hinkhua te zang liam zel hi. Kum 11 nung in kibawlhoih ding in hong kisa a pan honlak lai in amah panpih tu ding in Rosy kichi mi houpih siam, itna liantak nei leh damdawi lam thei in amah(Steve) hon enkol ding hong om hi. Huchia Steve khamtheih-guihtheih ngol ding leh a omdante bawlhoih dia hong kisak in haksatna lianpi hon tuak in khakhat sung bang gimtak in om a buaipih det ngai hi. Himahleh Rosy a fel zoh mahmah ziak in Steve haksatna te ah na huh in na panpih tawmtawm a Steve ading in le nuamtuam in pan nasatak in hon la hi. Khakhat zoh in hong damsiang deuh a a omdan hoihlou heh baihna te kingaihsiatna te hong kilamthak ding in khalam leh salam ah hong kipan in pan honla thak hi. Huchi lai in a kiangah Rosy le a hun awl leh a man hun teng in va om a Steve a din zong lungleng luatna ding omlou hi. A kithuah kawmkawm un a hunluite uh khong kikum khawm zel in leh mailam nawt ding dan khong kigen khom zel in om uhi. Niteng a hong kimuh chiang un a kal uah banghiam khat om in hon thei ua hiai pen a nih un a haih tuankei uh itna ahihdan a thei thou uhi. Huchilai in Rosy pen pasal nei leh ta nih numei khat leh pasal khat nei a na hi hi. Huai teng Steve in hontheih chiang in ki it in kingai le uhleng kiteng a omkhop ding dan lampi omlou himhim leh huchi le uh liau thei leh minse thei ahihdan uh a thei hi. Ni khat tuh nnasem ding nei in a va potkhia ua huailam ah itna thu khong kikum in a om uhi, midang a na haza bang na om in a tawp in Rosy pasal kiangah a hilh ua zuau phuak tawm in ahilou lou a hilh uhi. A pasal inle muangmoh in a zi Rosy a vaw maita hi. A huchi chiang in Steve in nuamsa lou in a nute sam in kha 6 bang omta ahihna ah innlam paiding in gen hi. A nute'n le va pikhe ding in kuan ua himahleh hiai hun in Rosy in Steve kiangah, "hon paisan ken aw, hon nawse mahmah ken" chi in khou hi. Himahleh Steve tuh a chihsa te chi tinten ahihna ah a pai thouthou a Rosy kiangah hichi in gen hi,"non it taktak leh na pasal nang itlou a hon vua leh chain a hon khih pa leh na tate nawsia inla ka kiangah hongpai in" chi in paisan hi. Steve ngai in Rosy kap keuhkeuh in ki diik hithit in mun khat ah nguaitak in tu ngilngel hi. Huchia Steve a pai nung in phone tungtawn in Rosy toh kithuzak tuah zel in a chang in kimu zel uhi. Himahleh hiai hun ah Rosy pen Steve kiangah om gige theilou ahihman in Steve leng lungleng ahiding a kholak khong pot in om hi. A chihleh nikhat nidang a kithuahpih sek numei gina hetlou mi nasa khat toh kimutuah kha in hong kizui pan ngal uhi. Hiai minu Lynda kichi toh hong kizuih non apat in Steve hinkhua hong kise non in Rosy leng a ngaihsak peih nonkei, Steve ngaihtuah dan a bel huai mi pasal leh ta nei khong bangchi kingaih a kiteng pih ding lah, ahihthei thil hilou ahihdan a a koih bilbel ziak mah a huchia hong kibual non ahipen hi. Himahleh Rosy in a it petmah a a phone zel a a chang in a inn uah a vahoh a Steve nu leh sanggamte khong toh a va kihoulim uhi. Nikhat tuh Rosy in Steve ngailua ahiding a a pasal kiangah Steve bazar lak ah om hon va zongpih in chi in a ngen a a pasal inle hehpih in a kuanpih hi. A huchilai in bazar ah Steve inle a na mu a himahleh kimuh khem bawl in inn tung khat ah kaltou in huai ah Lynda toh tangsiat khong ki sitsak in Rosy engbawl kichi in om ua, Rosy in huai khong a muhtak in paw na mahmah hi. A puaknat lam a pasal in theihpih lou in huai ah na mi muhnop pa nungak toh a omkhom veh en ve chi zaw mah hi. Hunte hongpai liam zel in June kha kim lak in Rosy pasal asthma/pneumonia natna in hong si guih mawk in hiai hun in a tate uh neuchik chik hilai uhi. Huchia lusun a Rosy om ahihdan a ninawn zingkal a Steve in a theih in kisa in a car in va hoh hi. Si inn ah mi tanau-laina leh inndongta te khong om vengvung ahihman un Steve va lut zual in potkhe kikpah a Rosy nute in ah Rosy nau Nico kiangah a u pasal galna chi in sum 1000 va pia in sawtlou a omnung in paisan pah hi. Hiai hunlai in Steve leh a lawmnu Lynda in mundang apan khamtheih va la sawn in Lamka ah zuak sawn zel ua amau a ding kitoudelh in om uhi. A khenchiang in police leh helte mat khong in om ua hilehle a khamtheih zuak uh a hih ua a ngol theihlouh bang un tawpsan thei tuanlou in pilvangtak in zuak zel uhi. Huchilai in July kha a Hotdamna Camp(Chialpina) khat Steve veng sung ah biakin lianpen ah omding ahihdan honthei ua Steve leng nidang a hichidan khong ut ngeilou pa hong ut in a ni a pa u kiangah va ngetsak ding in va gen hi. A ni inleng hoih nasak pih in a va gensak leh Steve pen huai saptuam pawl mi ahihlouh ziak in a vaisaitute'n a seat hong om leh omlouh ding in en di July 10 tan in chi uhi, huaitak in seat hong awng thei dia a omtak in interview ding in Steve sam ua Steve leng vahoh in camp lutni chiang a hong lut ngal ding in ki gen uhi. Camp honglut ua Steve in a thilchin hoihlou khamtheih te a gum in hon ngol a Pathian panpihna toh hon zou in a tawp in chialpi na a thugen tuten kisikna leh khelh ngaihdamna thu hon gen un Steve pen a ma a hoihtak a thumangtak a a masa lam a tu gige pen huaini apan a nunglam ah vatu in buaina ama utthu leng hilou in hong kibolsak ta mai hi. Huaitak in thugentu pa'n vanaih suk in a mit ah en in a dip khoihsak a Satan bia ahihdan hon thei in a nitak in siansuah ding in hong kisa ua nitak a lawmte uh lup nung dak 9 lak vel in bangbang hiam Bible pansan a gen in siansuahna leh thumna honneih un Steve hong pum khauh a pastor pa khut in a ngawl a man ahihman in a khut lakkhiak sawm a pan lai in olive oil a a khut kinuh ahihman in Steve in pastor pa khut lakhe zoulou in a tawp in a kamsung apan banghiam hong pot in hong zawi dingdeng a huchi in a vante khong siansuahna in haltum sak vek uhi. Ni nih zoh in hong potkhia ua Steve leng a camper pihte uh khat damlou a damdawi inn ah a puak uh dam zoulou in si a huai va galna va nei malam in a zoh inn ah pai vengveng hi. Inn ah huchia kikhum in pastor te program bawlna leh kikhopna khong ah kikhom in kuan zel a, a inn uah siansuahna leh a room khong siansuahna nei in Satan biakna a vanzatte khong haltum uhi, hoihtak a a hun leh nite a hon zat touh lai in a camp lutpih te a na pukkik vek khin ua Steve kia a suakta ahihlai in a inn uah a van niinte a sanggamte'n sawpsak utlou leh a nu leh pa te toh kisel buai kha in hong om laizang hi. Huaitak in Steve in a lawm nu Lynda phone in No.4 hon puak ding in thukhak a hong paitak in Steve leng hanmual lamzuan in pai vengveng a va ki kap petmah hi. Inn ah paikik in huchia pastor te sapna khong ah hoh in va kikhom zel a himahleh a lungsim in lungkiakna khat nei hileh kilawm in kipah mel a pu kei himhim hi. Kikhom zou a gari a pai in Rosy kiangah va hoh hi. Rosy le a seppihte toh na om in Prayer Mountain ah hoh dek ahihdan uh na gen in bang hih zel eh na hoihta ngei khong chi in kihoulim ua sawtlou zoh in Steve in paisan pah in HillTown ah a lawmnu Lynda toh kimu in amau leng Prayer Mountain ah vahoh uhi. Nitaklam ah pai in inn a tung nung in kisil khia a a zoh Rosy te inn ah kikhopna ah hun zang ding in kuan hi. Hun a zatzoh un kihoulim ua thu tuamtuam kikum in a zoh nitak dak 9:30 vel in Steve pai hi. Huai nung Steve leh Rosy bel kithuzak tuah den in kimu zel ua, huchi in Aug 21 lak vel in Rosy te kiangah Steve a va panpihtu ding in va giak lut hi. Huai apan in Steve leh Rosy kikhen lou in omkhawm den ua a hohna uah hohkhom in bazar a kaina uah kai khom in kizui den uhi. Huchi in hong omkhop chiang un ki it kingai tuh kikhen nonlou ding in hong ki khutsuih in hong kichiam uhi. Tua nung sang kipaktak in a hunte uh zangkhom den ua kihoulim zel in nidang apat na kimutuah pah hileng zaw maw tua i dinmun sang a thupi zaw leh nuamsa zaw a ki omding hiven a kichi ua himahleh Pathian lemgel dan te thei thakthak kawm leh amau adia Pathian in thil thupi a sehkhol sak dante gen in a hun leh nite uh a zangkhom tou zel uhi.