Buallian khua ah ka thiltuah maktak mai

Kum 1994, June kha school kumkim khawllai hi in lawmte toh theipi veh kawm a gamvak ding in Lamka apan Buallian lamah kou mau sik-sakol(bicycle/BMX) chiat a tai in ka kuan uhi. Huai hunlai in Lamka leh Singngat kikal lampi khah a se mahmah in haksa mahmah hi. Minutes 50 khong ka tai nung un Buallian khua ka tung khongkhong uhi. Buallian khua ah ka sik-sakol te uh ka nawtsiat uh ngai ahihman in mi inn huangsung khat ah tawllut in sik-khainiang a vial in chabi in a 5 in ka kalh khom uhi. Huchi in gamlak lamzuan in khe in ka paitou ua gamla sim ka tung un theipi kung khong veh in a min te khong ne in a langlang ka kawm zualzual uhi. Innlam ah ka puak ding uh theipi tuh lou nailou in ka paitou zel ua gamlak munkhat ah dawp na om in a mun a nel huai hetkei hi. Huai mun ka tung un a kiim leh kiangah singkung a tam ziak in a nuai dawplak tuh a mial sim bekbuk a a vot huau huau hi. Huchia a kiang khong a ding a theipi kung khong a kal pawl toh ka omlai un dawp lak ah mi hiam gan hiam pai bang in hong ging nuau nuau a, tuilou(phailou)/buannoi sahtak lakah i pai a ging pok pok bang in ging a himahleh kuamah ka mu kei ua a ging pen in kou lam hon naih hiai hiai in a tawp in ka taikhia uhi. Kipasal sak in ka pai sawm tuankei ua a saklam gamlak lam zuan in ka paitou zel uhi. Huchia bangtan hiam ka paitouh nung un mualtung zang dimdem lak ka tung ua huai mun ah khodak kawm in ka kihoulim uhi. Den a ka thiltuah uh khong kong kikum khom ua bang a himhim deh aw, dawi/sikha hiam chu ahi ngeingei di khong ka chi ua ka lak ua a gilou deuh khat in i va enkik di ua hong om a om nonleh thau in kap suk ni hon chi mawtmawt a, hilehle adang teng in ka pompih kei ua i va etkik sang in mailam nawt in paitou zel zaw ni i puak ding uh theipi lou in vasa i mat uh a omleh tuate innlam ah paw le kithaman veve zaw inteh kachi uhi. Huchia ka paitouh uhleh lampi bawng te zawi dandeuh na om in tuamun ah singkung bup a bup na om in huai kawm apan in thawm ging ngaih a ngaih puak selsel ging bang khong om in ging in hong ging suk a koule kiguih in ka dingkhol kawm un ka en heuhou ua a tawp in ka thau tawi uh khong toh gophel khong a kikap huan in suang a deng pawl khong om in, chihleh daih malak ah koulam naih in hong ging solsol a om ngaihna omkei chi in ka taisuk ua a khanglam gamla sim tan huai ging in hon delhzui in huchi in hong dai a ka en tuah ua ka lau mahmah uhi. Kenbel ka lungsim in hiai dan chet a ging mah khatvei singtang lam ah ka zinlai a suaklu lou a ka kuanna lam ua singbul kawm a hong ging toh kibang ahihman in dawi ahih kathei ngal hi. 

Huchi'n in ka paisuk ua theipi bangzah hiam ka puakkhop ding chiat uh lou in ka pai ua, vasa khatle ka man kei uhi. Buallian khua ka tungsuk ua bangmah gentam lou in ka sik-sakol kalhna chabi uh hong in sik-khainiang sut in huchi in kisa in Lamka lam zuan in ka paikik pah uhi. Denchiah ni hong tum leh nuamlou ding ka chih man un lampi haksat toh ka kinoh mahmah uhi. Hiai ni apan sun a leng sikha lang theizel ahihdan ka gingta hi. 

Huailou in, 10 December, 2010 nitak inle Buallian khua kheng Thumna mun tua petrol pump omna kong ah leng thilmak tak khat ka tuak kha non hi. Ama a kon gen masak Buallian khosak lam a theipi veh a ka kuan ua ka thiltuah ua pan kum 15 leh kha 6 ching nung a hiai Buallian gamsung mah ah ka thiltuah maktak khat ahi kon gen non dek. Den a ka gen tarik 10 December, 2010 ni in Geljang khua pick-up truck khat accident in lamkhang ah guam ah kia a a sungah tuangte a si omkei mahleh uh a liam nasa sim om a tua a liamtak lakah khat Geljang khomi Lamka Damdawi Inn ah etsak ding a va pawsuk ding in a tanaute uh nungak khat in hon phone a hon gen hi. Huai laitak in kei leh ka school kailai a Class IX leh X ka zil pihte toh Khomawi ah Reunion nei in ka picnic uhi. A sanchi bangzah hiam dawnkha ka hihchiang a kham sim in ka chiak niania a nitak dak 7:30PM in ka phone hong ging a ka dawng leh, "Usiam, koiah na om? Na man diam? Geljang ah accident ah katanaute uh khat liam a damdawi inn ah etsak dia a zanzan a va puak ngai ahi", hon chi a kenle aw kong pai di kachi a Khomawi apan ka bike a taitou in Family Lane phakma deuh ah sawtlou khol in a zoh ka taisuak a Hq. Veng ka manoh suak hi. Ka tung in amau a na mansa diam ua uchi in scooty(Activa) khat in a nu toh pasal khat kipua ua kei toh a nungak nu uh bike a kipua in ka hohna ding lam uh zuan in New Lamka ah black a petrol thun in nitak dak 10 lak in Lamka nusia in Geljang ka manoh uhi. Lampi noplouh toh khovot toh bike a taitheih dandan a tai in kinoh tak in ka taisuk uhi. Dak 10:30 leh dak 11 kikal lak in Buallian ka tung ua ka taikheng ua lampi suk na mun ah taisuk in Thumna mun tua Petrol pump omna kiangah ka bike hong mit mawk in ki start zou nonlou in a tawp in ka lawmte uh scooty a hong tai te'n hon lap in huchi in ka puak nungak pen amau toh hong kipaw ding in ka gen a ken ka bike running start ding in lampi suk ah free a tai in ka try hi. Bangtan hiam ka tainung in hong ging a himahleh ka bike a gik dan chu mi 10 khong tuang mah bang in om a a handle lah kei hekdan a tailou in hong kihek a hat a hat in hon taipih mawk hi. A khenchiang in headlight hong mit guih in hong vak zel hi, bangtan hiam huchia ka tai nung in ka malam ah ka bike headlight in a salh khak na ah tangval hileh kilawm lah a mel dang kekkuak leh a mit hak kelkul leh san diakduak a khe alah lampi sik khalou a leng a kei hon en kelkul leh hon nuihsan lualua ka mu a maksa tak in ka en a a khen chiang in poster milem kigelh pouh kasa dek alah hon nuihsan te ka ngaihtuah a kei hattai dan in a hong leng kom zel in ka ma zawn zawn hong leng se hi. Huchia lautak leh dipkua tak a ka omlai in ka bike lah kei heklouh a tai ahihchiah ka kikou lawlaw a lah kuaman hon za kei uh zan dak 12 bang gingta ahihman in. Koimun tung ta kahia chihleh ka theikei ka bike lah a leng thoh a bangmai ta, ka lawmte'n lah hon delhpha se kei ua bangchi om a bang tuak kha ka hia chih leng a theikei ua Geljang na taitung na un teh honchi ua awl in hong tai uhi. Huchia ka lauh luat man leh ka dipkuaat man a ka lungsim ngaihtuah na mulmal theilou kawm a bike a ka tailai in thakhat in hong zang guih in a light hong vakpha guih a lamlian nawl lamsak lam ah mi lou lampi petna zui in ka tai tou a a lou lutna kelkong uh phukha in huai ah ka kibat huchi in ka bike le puk in huaimun ah ka kitah khakna ka dip nasa in ka lum hi. Huchia minutes 15 khong ka lup nung in ka lawmte hongtai ua ka nasam se kei a amau le hon mu tuankei uhi. A na taisuak ua Geljang khua na tung phei uhi, Geljang khua ah kei hon muhlouh chiang un mi accident te buaipih a lampi nawl a tu te kiangah hon kan ua, amau "kuamah bike a hongtai omlou ahi" a chih chiang ua lamdang sa in hong nung et ding in hong taikik uhi. Keile awl a na thoukhia in ka bike ka phong a ka start leh hong ging a huchi in Geljang kholam manoh in ka taiphei hi, saulou ka tai nung in ka kituak ua, "koiah khawl lah lampi ah lah kon mu kei ua?" honchi ua kenle, "lampi nawl ah taikhia ing a kipuk ing a nong tai ua le na thoukhe zoulou ing a kon na sap selouh ahi" chi in ka dawng lel hi. Huchi in ka taiphei ua Geljang ka tung ua a saklam tumlam pang ah taitou in accident a liam ka puak ding pa uh inn kong ah khol in a van ding khong hong kisa ua huchi in ken ka bike ka na check a problem omlou ahi chi in amau aman tak un scooty ah a van te pua in ken a damloupa toh ka nungak puak nu paw khom in Lamka zuan in kon kipankhia uhi. Khavak bang leng tum nuam simta bang in niam didiai a a vak bang leng vak kiukiau lel hi. Huchia kong tai zawm zel uhleh ka kuanlam ua ka bike a mitna mun ka tung un huai mun ah mikhat na ding belbul in ka mu ua, hiaipa le zankhang a khovot lailai hiai  mun a bang hih ahi mahmah diam aw ka chi ua ka khawl ua ka va naih phei hi. Ka va naihphei tak in a kiang ah buk om na lam manoh in na ki khin phei a, "hei U, hiai mun ah zankhang khang a khovot nuai ah bang hih na hia? Koimun ah om na hia? Ngak nei moh?" ka va chih leh khavak in a salh khak ding in hong kihei phei a huihah! ka dip bang a hawm zot zozen a ka kiguih toh ka chimul thou sungsung toh ka omkha keikuai a, ka lawmte bang lau in kikou zak uhi. A gim lah uih a uih si thang gim nam leh misi uih/ganpul uih sisan uih gim nam in nam sia in thuk nam hekhuk hi. Huchia mangbang tak leh lautak a ka omlai un thakhat in hong naungek nuih kauhkauh in hong mang hiau hi. Koule kintak in bike start in Lamka lam zuan in ka taikhe pah vengveng uhi. Huchia ka tailai un ka mi puak te gel in keisang in na lauzaw ua scooty a ki pawte gel lah chu kousang a hatzaw in tai zawmah ua kou a nung a tai in nung khong zau huanhuan in Buallian tai pel in Mata khua ka tung dek kuan uh Dam lampi koina phakma in lam nawl ah putek khat na ding non a hiai hun in zankhang zinglam dak 2:30 khong gingta a khavak lah mualdawn ah tum phialta hi. Hiai mun ah khawl non in, "He pu hiai mun ah bang hih na hia zankhang khovot hichi zahlai a bang hih a koilam zotsawm na hihiam?" chi a ka dot leh, "Nou honna ngak non ka hi, den in non paw utkei ua non taisan ua" hon chi tuh ka lungsim in den a sikha tangval ka houpih pa hiding eiveh kachi pah hi. Kenle a mel muhchian ut a ka houpih a, "hon paw ut lengle na tutna ding omlou a hon pawtheilou a hon taisan mah kahi" chi in ka naihphei lai in hong naupang nuih kelkel in hon en lelu a a mit lah chuh vatawt tui chia zet pha ding in hak kelkul a a ha bang gahtang chia chia pha in a lei sau a sau in hon khahkhia a a melsiat leh a uih toh ka lauh na toh ka dingna mun ah kong ko bang in ka khauh gawp a ka lau petmah hi. Ka lawmte lah chu a lauh na lam un Mata lam zuan in khe a tai toh scooty a kipua a na tai toh hon taisan ua, huchi in Lamka lam ah mehzuak dia hong kuan ding gari a meh tuamtuam leh mi hunkhop pua a gari hong tai ten hontuak kha ua, "bangchi eh?" chi in hon panpih ua huchi in ka halh khiak tak in ka bike start in ka taisuk a ka lawmte Mata khua a mi na phawng a a inn ua na omte lapsuk in huchi zinglam dak 3:30 khong hong ging in hong phalvak kiukiau in huchi in Lamka Damdawi Inn zuan in ka tai ua dak 4:15 vel khong in ka tung uhi. Hiai zan a ka thiltuah a khonung a ka gen leh kum 18 khong paisa mi huailak ah sih sia a si tangval khat om ahihdan hon gen ua huai kha hong lang hiding in ka koih pah ngal hi. Keilou le mi tamtak in hiai Buallian Thumna mun tua petrol pump omna kong lakah bang bang hiam na tuak kha zeuhzeuh sam uh ahihdan le a nung in mi gen ka za kha thakthak hi. Ama in theikha hileng zaw huai lamlam ah zankhua a sikha toh ki subuai a lautak leh buai zen a omdia vahoh teuhlou ding hi ing a. Kipasal sak a nungak(numei lawm bang kipolh pih) thu mang a om a phattuam louh dan tuh khovot nuai ah sikha lau a si lou phet a va ki omkhak loh.